القصيدة للشاعر/محمد عثمان عبد المطلب من ابناءامنتقو يخاطب فيها الشاعر/يوسف الحداد من ناوا ويحكى له مرارة الغربة ومأسيها[size=16]وهذه مقتطفات من كلمات قالها يشتكي فيها ألم الغربة لأحد رفقاء دربه :[/size]يوســف الحـــداد ..... عـنــاد الـغــربــة حـيـّرنــــــا
قــدرنــا القــاســـي زي مـــا دار .. هــو ســيّرنــــــا
جـفــيـنـــا ديــارنــــا ....... بـس حـاحـانــا طـيّرنـــا
وبـيـن بــراود الغــربـة فــي كـل ناحـيــة ديــّرنــــــا
أريت القـاســــي ... لــــو .... ناغـمـنـــا خـيّرنـــــا
♪♪♪♪♪
يوســف الحــــداد .......... نـبـيــــح الـبـعـــد ألـّمــنا
رمـينــا ســلاحنــــا ... مـنكـســريـــن ... وسـلـّمــــنا
فــي بحــــر الظـــــلام ..... كـيـــد الغربــة عوّمــــنا
كـتيــر أغـرانـــا ....... جـــوه تمــيمـــتو حـــوّمــــنا
وكـــــل نـــاس البلــد .......... بيقــــولــــوا روقــــّنا
ومـــــا عـــارفــــين ....... زمـــنا القاســــي عـوّقــنا
ومــــن أحـبابنــــــا ......... ســـو أسـبابــــو فرّقــــنا
♪♪♪♪♪
يوســف الحــــــداد ... ده شــــــوق للبلـــــد مكتـــــوم
يمــزّق فـــــينا ....... ينشـــطر الفــــــؤاد مكلــــــــوم
حـــــليل ناس البلــــــد .. زمـــــــن البحــر والعــــوم
زمـــــن جـــــدك . وأبوي ود أحمـــــــد المرحـــــــوم
مـــا عرفـــوا السفـــر .... ومـــا هـامـــو بالمشـــــؤوم
عاشــــوا مــــع اليقــــــان .... بالـكســــرة والخــــروم
زمـــان الســاقيــــــة .. ليهــــــا التـــور يجــر ويحــوم
زمـــن جـكســـم ..... تلـمــلــــم فــي شـمـــايــل القـوم
شـــــواويـــل التمـــر تـايــات ...... وكـمّــــيـن كــــوم
وســــوق الأربـعــــاء ..... الـ بيــوجـــد الـمــعـــــدوم
ودودرنــــا الزمـــــــن ........ ودانـــا للـخــرطـــــوم
انشــريـنــــا فـــــي أرض الله ....... شـلـنــا اللــــــوم
وخلـيـنا القـمـاري ..... وباريـنـــــا طــــــيـر البــــــوم
♪♪♪♪♪
يوسف الحــداد ........... أظـــن شـوقـك مــــتل شوقي
شوق لي يمه لي يـابــــا ... شـــوق للمـاضــي لي بكرة
شـوق للنـيـل والخـضـــره ...... شـــوق للديسة للدفرة
شوق للبوقــة والــبربـــخ ....... للـقـنـقــر على الجمرة
للجابيـق مـــع المـتـيــق ... سماحــة العــيـش بلا غزرة
شــوق لــي بـت صغـيرونــه .. تحت التمـــره منتظــرة
رفيقـاتا وزميــلاتا ......... ماشيــة بعــيد فشــان تقـــرا
ولتلمــيذ فــتح خــرتايـتو .. شـال قـلـم الرصـاص يـبرا
شوق للطاب والهوليقة ........ والعلّيف والمتره
وصوت قمرية بتناجي ... رفيقا يعود من السفره
تقول عشيشنا باقي خراب بلاك شن فايدة النفرة
شوق للخلوه والحيران .... لي اهل الله والفقرا
للعبّاد مع الزهاد ... يتوهو اشواق مع الحضرة
يبارو البرعي والماحي. دموعهم تغلب المطره
وما بنساهـو يا يوسـب حجـانا مع ضـي القمره
فاطمة السمحه شالا الغول وجوه الغابة ضاع اتره
دلّـه ولولـي والشـاطر ودعوات تختـــــــم السهره
شـوق لـوّعني عذبنـي للمخصـوص وللزهــــــرة
بانت فـي الخليـــــوه رهاب زي وزينـة في بحرا
شـــوق للشيمـــــة فــــواره للجــــــباده والفـــدرة
شـــوق للــــطار وناس جـزار للدلوكــة والنقــره
لـي حــبوبة بي عكـــــازا لـي زينوبـــا والســرة
لـي عيشا لـوي ولبن نحاحي الطير نقـولو كـري
♪♪♪♪♪
يا يوسف حليل وريقنا بالقراصة والكسره
واللملوجي سمنوا غزير والسبروق نكتله شره
بي مفراكه قرنها حامي خبير البربحا ونجرا
شوقي لأمنتقو الغالية لي سن قيفا لي شجرا
لي أهلا حنان باروني كان عاصراهم الحسرة
يلقطوا في اتر كرعيني حابسا أصواتهم العبره
وما قادرين يعبّرو عن مشاعر صادقة منعصرا
عيونهم فيها مليون قول تقالد وشّي منكسرا
أمنتقو جوه في جوايا سامي مقاما زي كبرا
اسمها حين يجيبوا لساني بالشوق ألقى دمعي جرى
فيهــا جذوري خالدة وضاربا فيهـا أحبابي والثمرة
يكفي أقول عليها الجنة من حـورا وصلاح بشـــرا
بــــي خلاويهــــا نار قرانا بـــي كبسا ووقود تورا
بالعرضـــة وخشوع الرميــة باركا الله زاد أجـــرا
شوقـــي كتير كتير بلحيل لــي دربوقا لـي بقـرا
لي يوم سوقا والبنطون معمّر ساحة الحجرا
لي رومي وشبابا هناك وأغشى البكري بي جزرا
لي ناوا ومشارف قوزا ليك يا ساتي ود نصرا
وما تنسى الفويجة هناك باقي ملك سكن قصرا
ناوا حقيقة زينة عروسه يخلب للعقول سحرا
حاويها الرمال والخدره سيد احمد زمان ذكرا
الشوق ليها تب كاتلني للعبادي والفقرا
لي تمر العرب أشواقي لي واديها لي اترا
لي حاكمابا لي كريابا للكتاب والبصرا
ديل الحكمو الكلتود وخلو قريرنا طين وترا
لي حوض لتي بي عربانو بشاريتو والخبرا
لي قيزانو لي وديانو لي اطرافو والكسره
لي كروانا داك فنانو للفصّاح والشعراء
لتي جمالا آسر وزاهي والزين لابسا لي ضفرا
شوقي ما بيكمل ليها بلدنا أغلى ثرى
لعرب حاج ولي زمراوي وعز الدين وباص جبره
كردي وشكري والعرمان قوزا المكسي بالخدره
ود سيد يغني عليها ساند شعرو فوق حجرا
ولو تسألني عن كدكول أقول زينة الشرق دره
بلاد الطيبة والطيبين ولي ناس هناك امراء
دوام ظاهرين ومعروفين خطاهم للكرم تبرا
للمقاودة والمسكيت هو القيزان عنيد حجرا
بشرا مبيلو يتباهى ويحندك ديمه في عشرا
بلاد سلطان وشيخ إدريس عزيزنا العزتو الأسرة
ديار احميدي فيض العلم فاقبو الفقهاء والبصرا
للغدار مع صلاحا التسعين والعشرة
أهل العزة ناسا فيها ناس مرحب مع الصفرة
مسجد يحكي عن تاريخا ناصع وافيه لي نذرا
♪♪♪♪♪
يا يوسف ده شوق غلاّب غلبني وغلّب الفكرة
يا يوسب ده شوق كتال كتلني وصابني بي نظره
بقيت منظور بقيت مسحور وما ظنيت أطيب أبرا
عنيده الغربة أسرتني ومتلك روحي منشطرا
شالت مني كل جميل وما خلت بلا الحسرة
حليل إلجائي والمجهول بخاف والله من بكره
♪♪♪♪♪
يايوسف أرح نرجع نجدد للبلد أسرا
ونتكرف أريج المنقة شايل ديمة روح عطرا
نستمتع بضل ارتيقا وشمسا مايله فوق عصرا
وبي ضو القمر في ليلا يتلصص وسط تمرا
ما اجمل قمرنا هناك والسماء حاضنا في صدرا
تقبل فيهو باهرا نورو رامية ضلاما بي ضهرا
أرح نرجع وخلي الزاد يكون طوريتك الماسحه
قبل ما تقفل المسرة وقبل ما تقفل المسرة
